ब्रेकिंग

सफाई कर्मचार्‍यांना योजनांचा लाभ देण्यासाठी डाटा बेस तयार करा : डुडी

Wrutuja pandharpure
30 May 2025

पुणे : सफाई कर्मचार्‍यांना शासनाच्या विविध योजनांचा लाभ देऊन त्यांची उन्नती व्हावी यासाठी त्यांची वयोगट, शिक्षण यानुसार यादी (डाटाबेस) तयार करावी, असे निर्देश जिल्हाधिकारी जितेंद्र डुडी यांनी दिले.

सफाई कामगारांच्या विविध अडचणी व प्रश्नाबाबत जिल्हाधिकारी कार्यालयात आयोजित बैठकीत ते बोलत होते. यावेळी समाज कल्याण सहायक आयुक्त प्रसाद खैरनार, जिल्हा परिषदेचे उपमुख्य कार्यकारी अधिकारी ए.आर. गुजर, जिल्हा समाज कल्याण अधिकारी राधाकिसन देवढे, पुणे महापालिकेचे मुख्य कामगार अधिकारी नितीन केंजळे, ससून रुग्णालयाचे वैद्यकीय अधीक्षक डॉ. यलाप्पा जाधव आदि उपस्थित होते.

सफाई कामगार आणि त्यांच्या पाल्यांच्या कल्याणासाठी काय उपाययोजना करण्यात येतील. यासाठी त्यांची निश्चित आकडेवारी असणे आवश्यक आहे. त्यानुसार सर्व रुग्णालये, नगरपालिका, महसूल कार्यालये आदि ठिकाणच्या सफाई कर्मचार्‍यांचे सर्वेक्षण करावे.

या समाजातील तरुण पिढीला शिक्षणासाठी विश्वकर्मा योजनेतून रोजगार आणि उर्वरितांना सामाजिक व आर्थिक सुरक्षा योजनांचा लाभ कसा देता येईल, याबाबत प्रस्ताव तयार करता येईल, असेही जिल्हाधिकारी म्हणाले.